Umurwi ADF la Rambla ugizwe n’abakinyi, umumenyereza n’abo bafashanya, indongozi hamwe n’abandi, bose hamwe bashika kuri 27, nibo bahejeje gushika mu gisagara ca Bujumbura k’ubutumire bw’umurwi wa Aigle Noir aho uje kwitabirira inkino z’igikombe ca Nkurunziza Cup .
Uwo murwi wo mu gihugu ca Espagne washitse mu Burundi,uje mu ntumbero yo kwitabira urukino rwa Nkurunziza Cup ruzoba ku munsi wa gatandatu igenekerezo rya 29 Ruheshi umwaka wa 2024 igihe c’isaha indwi n’iminota mirongo ine n’itanu (13h45) ku kibuga ca Nkurunziza Peace Park Complex i Makamba aho bazokina n’umugwi Aigle Noir Cs .
Umugwi ADF La Rambla ukaba waciye werekeza kuri Hôtel Eden Garden Resort iri mu Kajaga gufata agatutu aho wakiriwe n’umurongozi mukuru wa Aigle Noir Cs Révérien Ndikuriyo.
Inyuma yogufata agatutu uwo mugwi uraza guca ubandaniriza urugendo mu ntara ya Gitega aho uzokorera imyimenyerezo iminsi ibiri. Umwimenyerezo wanyuma kuri uwo mugwi, uzobera ku kibuga ca Nkurunziza Peace Park Complex i Makamba ku munsi wa gatanu igenekerezo rya 30 Ruheshi 2024.
Ni irya mbere umugwi Aigle Noir Cs wakira umugwi wo ku mugabane wa buraya .
Igikombe ca Nkurunziza Cup kikaba kigiye kuba ku ncuro ya kane. Mu mwaka uheze catwawe n’umurwi Vital’o FC aho watsinze umugwi Flambeau du Centre .
