Urwaruka ruhurikiye muri koperative “kenura imiryango iwacu” rufashwe mu mugongo n’ishirahamwe ryo mu gihugu kibanyi ca Tanzaniya “SAORE Company Limited” ruherutse gushing ishirahamwe ry’ubworozi tutari tumenyereye aha iwacu, ubworozi bw’inkwavu.
Nk’uko bishikirizwa na Muzungu David asanzwe aserukira imbere y’amategeko iyo koperative, mu nyigisho baronse mu gihugu kibanyi ca Tanzaniya zijanye n’uburimyi n’ubworozi, mu bitungwa vyonse bikunze kwororwa hano iwacu, babonye ko inkwavu arizo bokworora kuko ngo zitandukanye n’ibindi bitungwa dusanzwe tumenyereye.
Ikintu ca mbere ubworozi bw’inkwavu busumbije ukworora ibindi bitungwa, David atumenyesha ko urinze worora inkwavu, ikintu cose kizivamwo ari amafaranga kandi atari make, agatanga akarorero k’amaganga yazo, umwavu, inyama n’ibindi kuburyo urukwavu rumwe ngo rushobora kwinjiza amafaranga y’amarundi arenga ibihumbi amajana atanu ku kwezi ku kwezi. Ikindi ngo n’uko inkwavu inyama zazo zishobora kuribwa n’abarwaye igisukari ata ngorane n’imwe.
