Umuryango w’umuhisi Mbazumutima Henry waraye ugarukiwe n’abo bakinanyeI.nyuma yo kwitaba Imana haciye ukwezi , Abakinyi bakinaye bahisemwo gufasha umuryango yasize.
Hari kuri w’Imana Igenekerezo rya 09 Ruheshi 2024 igihe c’isaha zine z’agatondo ( 10h00) ku kibuga ca zone Kinama , niho Incunti n’abagenzi bakinanye n’umuhisi Mbazumutima Henry bakina urukino rwa gicuti mu ntumbero yo gufasha umuryango wiwe . Urwo rukino rwagaragaye umwana wa mbere w’umuhisi Mbazumutima Franck , asanzwe nawe nyene akina umupira w’amaguru mu cicaro ca gatatu .
Urwo rukino rwahuje umugwi Athletico Olympic Umuhisi yigeze gukinira ndetse n’uwundi mugwi uvanze n’abakinyi batandukanye bakinanye kera . Rukaba rwarangiye umugwi uvanze abakinyi bakinanye mu migwi itandukanye utsinze ibitsindo 2-1.
Inyuma y’urwo rukino , uwo Muryango waciye ushikirizwa amafaranga incuti n’abagenzi bageranije , uca uhabwa imiriyoni 5 z’amarundi ( 5.000.000.fb), hamwe n’uwundi Muriyoni n’amajana atanu wavuye ku ncuti ziwe n’abagenzi basanzwe baba muri Africa y’epfo ( 1.500,000fb).
Mbazumutima Henry yitavye Imana mu kwezi kwa Rusama Igenekerezo rya 13 Rusama umwaka wa 2024 muri Africa y’epfo biciye kungwara .
Nahimpera Bienvenue yatunganije urwo rukino , arashimira abantu bose baterereye uwo muryango w’umuhisi, harimwo abakinyi bakomeye b’Intamba mu rugamba bakinanye nka Hussein Banza , Sengiyumva Sadiki ( Makiss) , Kama Alfani , Ismai Mutambaro , Yamin Seleman , Musaba Selemani , Karim Makenz ndetse n’abandi , aca avuga ko ivyo bakoze bama babikorera n’abandi bakinyi atari ubwa mbere babikora .
Umutambukanyi w’umuhisi nawe Byamungu Nadia , yaronse akanya ko gushima rwose abantu bose baraye babafashe mu mugongo , aca asaba y’uko umuntu wese afise umutima wo gufasha yoza bagafashanya kurera abo bana .
Kubwa Akili mukuru w’umuhisi nawe yarashimiye bimwe bivuye ku mutima abantu bose bagize ico bakoze kuri uyo Muryango aca asaba y’uko , umuntu wese yagize ico akoze kuri uwo muryango nawe nyene bigashuka akagira ikibazo azomwiture .
Mbazumutima Henry yakiniye imigwi itandukanye ya hano iwacu nka Memisa, Olympique Star , Vital’o FC , Athletico hamwe n’umugwi Nserukira gihugu Intamba mu rugamba .
Mwomenyako Henry Mbazumutima yashengeye asize umugore n’abana 5 , abahungu 4 ndetse n’umukobwa 1 .
