Uwurongoye ishirahamwe ry’umupira w’amaguru mu Burundi Général de Brigade de Police Muyenge Alexandre yaraye akeje umurwi Bumamuru Fc wo mu ntara ya Cibitoke waraye utahukanye ubwa mbere mu mateka yawo igikombe ca Primus League 2022-2023.
Hari kuri uyu w’Imana igenekerezo rya 21 Rusama 2023 isaha zine zo mu gatondo ( 10h00) I Gitega kuri Tropitel Hotel aho hari haramutse haba Inama ya bose y’ishirahamwe ry’umupira w’amaguru mu Burundi FFB yo kurabira hamwe raporo y’ibikorwa iryo shirahamwe ryaranguye mu mwaka wa 2022 , Inama yari yitabiriwe n’abari muri Comité Nshingabikorwa y’ishirahamwe ry’umupira w’amaguru mu Burundi FFB , uwurongoye CNO Lydia Nsekera , Uwari aserukiye ubushikiranganji bw’urwaruka inkino n’imicokama , Abarongoye amashirahamwe y’inkino mu ntara , abarongoye imirwi yo mu cicaro ca mbere n’icakabiri hamwe n’abandi batandukanye . Uwurongoye ishirahamwe ry’umupira w’amaguru mu Burundi Général de Brigade de Police Muyenge Alexandre niwe yuguruye iyo nama aho yatanguye akeza umurwi Bumamuru Fc waraye utahukanye igikombe ca Primus League 2022-2023 , asubira kandi akeza n’imirwi yaduze mu cicaro ca mbere muri uno mwaka nka LLBS4A Amasipiri , Moso Sugar hamwe na Academy Telaviv Fc .
Uwo arongoye ishirahamwe ry’umupira yasubiye kandi ahoza imirwi yakorotse mu cicaro ca kabiri aca ayisaba ko yoraba ingene yokwongereza inguvu kugira izogaruke ikomeye .
Mwomenyako iyo yari Imana ya bose igira kabiri kuvaho atorewe kurongora ishirahamwe ry’umupira w’amaguru mu Burundi FFB .
