Ishirahamwe Payway ryahora rifasha mu kugurisha ama “unité” no mu kuriha amafagitire y’amatara n’amazi vy’ishirahamwe Regideso ngo ntirirekuriwe gusubira kuja kurangura ama “unité” muri Regideso kuva itariki ya 5 Kigarama 2020.
Mu kiganiro yahaye abamenyeshamakuru kuri uyu wa gatatu igenekerezo rya 2 Kigarama 2020, umuyobozi mukuru w’ishirahamwe rijejwe gukwiragiza amazi n’umuyagankuba mu banyagihugu Regideso avuga ko amasezerano bari bafitaniye n’ishirahamwe Payway yarangiye.
Simeon Habonimana amenyesha ko ishirahamwe Regideso ririko rirasubiramwo ingene rikora kugire ryorohereze gusumba abanywanyi. Ngo rigiye gushiraho ibibanza bitandukanye bizofasha abaryitura.
