Isanamu ya Lionnel Messi ari kumwe na Ndayishimiye Youssouf iriko yamamara ahatari hake kw’isi.
Hari ku musi wa gatandatu igenekerezo rya 08 Ndamukiza 2023 aho umurwi wa OGC Nice ukinamwo umurundi Ndayishimiye Youssouf Nyange wahura n’umurwi wa Paris Saint Germain mu rukino rw’indwi ya 30 y’ihiganwa rikuru ry’ubufaransa ( Ligue 1 Uber Easts)
Urwo rukino rwarangiye OGC Nice itsinzwe na PSG ibitsindo 2-0 , ivyo bitsindo bikaba vyinjijwe na Lionnel Messi ku munota wa 26 hamwe na Sergio Ramos ku munota wa 86 w’urukino .
Youssouf Ndayishimiye yakinye iminota yose mugihe rwari urukino rwiwe rwa mbere inyuma y’indwi zibiri avuye mu mvune .
Inyuma y’urwo rukino Lionnel Messi yaciye ashira isanamu ku mbiga hwaniro ziwe ari kumwe na Ndayishimiye Youssouf , aho iyo sanamu yabonywe nabashika 114.000.000 kuri Facebook yiwe mugihe kuri Instagram iyo sanamu yarabwe n’abashika 453.000.000.
Benshi bakaba babonye ko iyo sanamu yatumye uwo mukinyi w’Umurundi amenyekana cane bivanye n’uko Lionnel Messi ari mu bakinyi bambere bakunzwe cane kw’isi kandi bakurikiranwa.
Mwomenya ko Ndayishimiye Youssouf Nyange ariwe mukinyi wa mbere w’Umurundi yavuye muri Primus league, amaze guhura na Messi igihangange c’umukinyi gifise imipira y’inzahabu myinshi kurusha abandi .
